La Fistietcha: la enanchaurá del vatche, la vecindá del ríu, y la Yosa el Molín con el Tacón, tras andar un retu tchergu per sitios estrenchos y rebayosos, o tras subir la Esgaxá, fueron el motivu de que se yos ocurriera a los vieyos decir que taban en un sitiu fértil (festum pa los latinos), aunque pequinu (los sofixos -iitchu o -ietcha son diminutivos) en que había de tó.

Pa otros, la Fistietcha, como el Infestal, tchamaríase asina por tar arrodiá de cuestes como son el Recuistru, el Picu la Vatchina, el camín de la Ampotcha y el del Omeal. Pero pa eso yera preciso ponéi delante la "In" pa que resulte Infistietcha, como Infiesto o Infestal. La xente dixo siempre Fistietcha; y hay un sitiu que nun quea muy tchuiñe que se tchama Cutchá Fistietcha. Y pémike debe ser asina, en sin acazurrái el nome como faen los que dicen Enfestiella o Infistiella.

Nel letriru que antano se vía pa anunciar el puiblu decíase: "El tchugar", y de segures que se refier a lo vieyo del puiblu, que debú tar aposentéu na Yosa el Molín, por eso apaecen, ca vez que se mete el aréu, piedres amañoses pa facer paré de eses que facían al tchevantar los castros. Na Fistietcha hebo tamién unos señorones, los de la Caseta; la última de tós foi Felisa de las Alas que se casó con Álvaro Lobo. Los sos fiyos Carlos y Víctor Lobo de las Alas vendieron toes les finkes que tenían nel puiblu a vecinos de Nembra, porque yos apitezú más dedicase a otros negocios en Avilés y en Madrid. Eso foi a mediaos del siglu paseu.

El Omeal: Tchugar de olmos o tchameres, anque, como pasa munches veces, agora nun se atope niún per los alreeores.

Arnizo: Sitiu amañusu pa casietchos, tamién lo ye agora. Flores hayles abondo, pa que nun se cansen de trabayar les abeyes, y pa endulzar y aclarar el gargüilu de los paisanos, y que asina puean dar cantaríos como sólo etchos saben bien facetcho; tamién hay "arnos" troncos buecos pa que les abeyes pongan netchos les sos cases onde fabrican la miel.