L'Otero: Picotietcho ye el picu -pequinu él- que tien a los sos pies a isti puiblu. A él debe referise el nombre de L'Otero, ansina, en neutro, non como y ponen El Otero, porque entós en Nembra tchamaríamosi L'Otiru. Un "otiru" ye un sitiu pa mirar tchuiñe, un tchugar eltu. L'Otero ye lo que ta a co Picotietcho. Tamién podría ser el sitiu onde ta un altar. ¿Nun taría per tchí d'algún altarín, por tar a co Castietcho o La Campa? ¿La capilluca de La Tchamarga nun tará puesta nel sitiu de isi altar, tratando de cristianizetchu?

La Casona: Casi toes les cases de Nembra taban separaes unes de otres, anque fuera per un caliyu, por pequinu que fuera. Atopar unes cases apegaes nun poía menos de tchamar la atención, como pa distinguitches de les demás. Na parte más yana del puiblu, y no muy tchuiñe del Palacio, debú ser la casa de otros señorones.

Perasente: Plasma abondo lo apartá o asente que tá esta casa: cerca, pero tchuiñe. Nun creo que tenga na que ver con les peres.

La Tchamarga: Onde tchueve muncho nun estraña atopar sitios que se tchamen el Tchamergu, el Tchamargón, el Tchamargusu. Tchama y fotcha axúntanse, y hasta con madreñes pués quear entatchéu. Ya a la entrá de lo que foi el portón pa la casería y la ermita -antano sobre tó- taba la razón del nome que tamién se yos daba a los Señorones de la Tchamarga.