El Soyano: Con el asfaltao de la carretera nun se notan tanto les cuestikines que había. Pa baxo del Yano de la Casona ta el Soyano. ¡Cuántes carrerines de nenos, y no tan nenos, se daban per la nuitche al subir pa la Casona, al estencu, o al baxar pal Kempu, por mor de la escuriá y el mieo a los muertos! Yera de onde más fuegos fatos se vían, por tar presidíu del cementiriu.

El Kempu ye el tchugar céntricu del vatche. El sitiu del cultu, de les reuniones, de les decisiones. Yera y ye. Ye de onde los antepasaos -desde les tumbes que dexan munches veces per la nuitche- curian ala xente, los sos andares y los sos penares.

Mediavitcha: Ente el Kempu y la Corralá tan les cases que se tchaman asina. Ye la vitcha, la quinta que tá en medio. Nel siglo paséu yera Mediavitcha el centro del puiblu de Nembra, pos nun había cases nel Kempu.